الأربعاء، 11 يونيو 2008

انا كنت فى منتهى السخافة

ان قررت احكي عن موقف حصلى النهاردة

انا كنت ماشى على ارض المحروسة عادى جدا انا و واحد عزيز عليا وكنت شايف من مسافة كدة
تتقدر بكام متر سيدتين و2 رجالة كانوا صوتهم عالى قوى يمكن يكونوا بيتكلموا بصوت عالى يمكن
وكمان يمكن يكونوا يتخانقوا مع بعض انا قلت فى عقل بالىياااد عادى طب ماهو كل الشعب بقى بيتخانق
اية الغريبة فى الكلام دة دة حتى الى مبيلقيش حد يتخانق معاة بيبقى ماشى فى الشارع بتخانق مع دبان وشة

وكنت انا بدورى قربت خطوات منهم فبيصت بصة عابرة كدة لقيت المشهد الاتى
واحدة من الاتنين الستات دول معاها طفل صغير وهى حطاة فى عربية الاطفال
الى المفروض هى بتبقى بتزقها قدامها وواحد من الاتنين الرجالة كان عمال بيشد
فى العربية بالجامد قوى والواد الصغيركان عمال ييعيط

وبردة وكالعادة قلت ياد خليك فى حالك ولا هوانا هعيش فى دور الحشرى
-ودى للعلم شخصية بكرها جدا - المهم كملت فى طريقى وهم بقوا وراى بردة ب5 او 6 متر
وسبحان الله كان مقدرلى انى اسمع الكلمة السحرية الى فكتلى لغز الموضوع دة
لما الراجل الى كان بيشد العربية قعد يقول بصوت عالى يعنى انتوا - موجها الكلام لجوز الستات-
تضحكوا عليا واصلح العجلة ومخدش غير نص جنية

وانا رحت قلت فى بالى يا نهار ابيض يعنى الخناقة دة عشان نص جنية
طب والله انا كنت فاكر الاول انهم ممكن يكونوا قرايب ولا حاجة وهو بيعزم عليهم- اصلهم كانوا واقفين جمب باب بيت-

عشان الواد الى بيعيط عادى منا قلت يمكن يكون من الصعايدة الغشم الى يقطعللك هدومك عشان يدخلك البيت وييوجب معاك
دة بالنسبة للصعايدة عادى -انا فى تدوينة قادمة ممكن احكيلكم عن الموضوع دة لما حصل معايا-

وانا فضلت ماشى فى طريقى وعمال اكلم نفسى عشان نص جنية طب وفيها لما يصلح العجلة وياحد نص جنية
الله طب ولو هو عايز فلوس تانى يمسك عربية الواد عشان الست متعرفش تمشى
طب وهو مصعبش علية الواد الصغير الى كان عمال بيعيط
وفضلت ماشى وعمال اكلم نفسى من ذهول الموقف العجيب دة

وبعد فترة من المشى وانا لشة بكلم نفسى طب مش ممكن جوز الستات دول مايكنش معاهم فلوس
طب طالما هموا طلعوا مش قاريب زى مانا مكنت نتنيل على عيتى وفاكر
وان الموضوع كلة سببة ان الراجل عايز فلوس اكتر

انا لية محاولتش اساعدهم ولا كنت دفعتلوا الفلوس واطلقت سراح الطفل
الصغير قبل ما اطلق سراح امة

انا كنت فى منتهى السخافة




هناك 14 تعليقًا:

طائر حزين يقول...

السلام عليكم
المشهد دة أكبر دليل على الوضع المهبب اللى بلدنا عليه انت مستغرب اوى ان الرجل زعلان عشان اخذ بس نص جنية طب مهو بيعيش بس على الأنصاف جنيهات دى يبقى ازاى بس ميزعلش ولو زى مبتقول ان الرجل جوز الستات دى يمكن مش معاه فلوس يبقى مش عيب ابدا انه يشيل ابنه وميضحكش على حد ويستحل تعبه واما يبقى معاه فلوس يبقى يصلح العجلة
أما عن الطفل الصغير فلو كان عارف باللى مستنيه مكنش جاء أصلا.
وعلى فكرة يمكن انت لو كنت اتدخلت كان أبو الواد اتخانق معاك ودة بنسبة99% فمتلمش نفسك.

سلبية صح؟يمكن بس صدقنى هو دة الواقع

kochia يقول...

صح الواحد بيشوف حاجات كتير غريبة اوي
بس فعلا بيخاف يتدخل لان اللي واضح بيكون غير واقع الامر
وحصلت مواقف كتير محرجة من هذا النوع
ساعات بقف اسمع شوية قبل ما اتدخل اشوف الموضوع زي مانا فاهمة ولا لا

تحياتي

كاميليا يقول...

مش تزعل من نفسك

المواقف دى بتحصل كتير

قدر الله وما شاء فعل

يمكن لو كنت عرضت المساعدة كنت حليت المشكلة

ويمكن الست كانت احرجتك بكلمة

مين عارف؟ علشان كده فى المواقف اللى زى دى بنفكر كتير قوى قبل ما نتصرف، وبيكون الوقت فات

تحياتى واحترامى

كاتب مصري يقول...

هل يمكن أن أدعوك لزيارة مدونتي المتواصعة ..مع أني أطلب هذا الطلب على استحياء لأن هذه زيارتي الأولى لك ولكن سيكون هناك ود بين المدونتين
تحيتي
مدونتي هنا
http://kanyatklam.blogspot.com/

إيما ( أم البنين) يقول...

لازم نكون إيجابين ..فعلا لكن الكلام النظري حاجه وإللي بيحصل حاجه تانيه ..
المهم نتعلم من المواقف ولو إتكررت نتصرف بالطريقه الصح ..بس ياريت نقدر
وكفايه إحساسك بالذنب
تحياتي أم البنين

ايام العمر يقول...

طائر حزين
انا متفق مع كلامك جدا
هو دة الواقع للاسف

جزاكى الله خيرا

ايام العمر يقول...

kochia

الحاجات الغريبةبقت كتيييييييييير اوى فى الزمن دة

سغعدت بمرورك

ايام العمر يقول...

كاميليا

الفكرة كلها انى صعب عليا منظر الواد الصغير

انما انا للاسف متبرمج انى مبدخلش فى حاجة
لانى بالطريقة دة مش هخلص
بس زى ماتقولى كدة منظر الواد مع التفكير بتاعى فى الموضوع خلانى فضلت ماشى مذبهل فترة طويلة
وبعدين قعت اقوول انا لية ما حولتش اساعد الست دة عشان خاطر الولد الصغير دة

شكرا لمروورك

ايام العمر يقول...

كاتب مصرى

سعدت بمرورك وانا زرت مدونتك
بس كان نفسى اسنع تعليقك

سلااااااااام

ايام العمر يقول...

ايما

انا اتمنى انى اكون ايجابى واساعد اى حد

بس لو انا ادخلت وهو راخ قالى كلمتين محترميت "انت مالك" ؟

انا اصلى اكتر حاجة اكرها انى ادخل فى حاجةمتخصنيش

هى دة المشكلة

مين يستاهل ومين لا

مين هيقبل ومين لا

سعدت بمرورك

شفقة هانم واحسان بك يقول...

صحيح سخافه....بس معلش ابقى عوضها فى موقف تانى واه اواحد بيتعلم....

عيله مفتريه سابقا يقول...

مستغرب ليه؟

مهو ده حالنا بالضبط

محتاجين ومعناش ومتقدرش معلش تعيب على الراجل لان ده اكل عيشو

ولا عيالو دول مش زى الطفل ده

انا بس عايزة اقولك متلومش نفسك على حاجه ومتأنبهاش

كفاية انك حسيت بده

سلامى

funckydoctor يقول...

ما تتهمش نفسك بالسخافة
كان برضه ممكن يطولك من التهزيق جانب
بس فعلا كل ده يدل على اننا عايشين تحت خط الفقر
تحياتى

البت قباحة يقول...

الله لنت عملت عين العقل انك مدخلتش
دة راجل بيتخانق على نص جنية و واخد الطفل رهينة و بيزعق فى واحدة ست و انت عايز تتدخل

دة كان اقل واجب حطك مكان العجلة
يا عم الواحد ناقص

مستنية موضوع الصعايدة

سلامى